Vinjestoga

Vinjestoga er barndomsheimen til diktaren, journalisten og språkmannen Aasmund Olavsson Vinje. Høyr om livet i barndomsstoga, om korleis Vinje vart ein av dei fremste diktarane i Noreg og om journalisten Vinje.
Stoga ligg ved europaveg 134 på Vinjesletta i Vinje kommune. Ho er ei typisk husmannsstoge frå 1800-talet. Her vaks Aasmund opp.

Framleis står mykje av interiøret att frå den tida då Aasmund og familien hans budde i Vinjestoga. Her er mellom anna seng, bord og stolar, samt bjølla som Lykle, mor til Blåmann truleg bruka. Noko har komme til i seinare tid, til dømes skrivepulten Aasmund bruka då han jobba i Justisdepartementet. Andre gjenstandar er ei skreppe og ei kiste, samt eksemplar av ”Dølen” - Vinjes eige tidsskrift, samt diverse brev og skrifter.

Som liten skal Aasmund ha vore noko for seg sjølv. Han kunne parodiere presten i bygda, eller ha høgtlesing for slekt og vener. Leselysta var stor allereie då han var gut. Då han hadde lese Bibelen, Holberg, Petter Dass og Snorre, var det ikkje meir å finne i heimen. Då måtte han ty til presten, som kunne låne han bøker.

Då han var konfirmert, reiste Aasmund frå Vinje for å gå på skule. Han kom likevel attende fleire gonger. Ein periode var han også omgangsskulelærar i bygda. Frå å vere ein fattig husmansgut vart Aasmund Olavson Vinje ein av våre framste diktarar. Han skreiv mellom anna ”Blåmann”, ”Du gamle mor”, ”Den dag kjem aldri”, ”Storegut”, ”Ved Rundarne”, ”Tyteberet” og ”Ferdaminne”. Gjennom skrivinga bidrog Aasmund Olavson Vinje, saman med Ivar Aasen og Arne Gardborg, til å bygge opp nynorsken som eige skriftspråk. Frå 1858 – 1870 gav han og ut sit eige frie og uavhengige blad – ”Dølen”, og har i ettertid vorte reikna som Noregs fyrste moderne journalist.



I Vinjestoga kan ein i dag oppleve og høyre forteljingar om livet og kunsten til Aasmund Olavsson Vinje. Grupper kan tinge omvising med kåseri og song framført av familien Nordstoga.